Mekas (U.S.A.): Hnub no muaj txog 720,630 leej raug tus kab mob COVID-19 lawm. Cov tuag muaj txog 37,202. Haiv neeg dawb thiab haiv neeg dub yog cov raug coob tshaj. Muaj ib txhia pejxeem tsis kam nyob tsev lawm. Lawv tuaj mus tawmtsam nomtswv tom tej lub tsev nom nyob ntau lub xeev. Lawv xav kom nomtswv qhib tebchaws cia kev lag luam rov muaj dua li qub.
Lub xeev Minnesota yuav nyob tsev txog hnub xiab 4 lub 5 hli ntuj. Lub xeev Wisconsin yuav nyob tsev txog hnub 26 lub 5 hli ntuj. Muaj ntau lub xeev yuav koom tes uake txog kev qhib lag luam thiab pub pejxeem tawm zoo licas. Qhov uas lawv tseem tham yog yauv ua licas thiaj muaj kev kuaj mob txaus rau pejxeem txhua tus. Tamsim no tsis paub tias coob npaum licas vim tsis muaj kev kuaj txaus.
Nyablaj (Vietnam): Tau ob peb hnub, tsis pom muaj leejtwg kis mob COVID-19 ntxiv lawm. Tamsim no, tagnrho tebchaws muaj 268 leej raug tus kab mob no. Muaj txog 214 leeg twb zoo lawm. Hnub 16 lub 4 hli ntuj yog hnub kawg uas tseem fwv tebchaws txwv tsis pub pejxeem tawm nraum zoov. Tebchaws yuav pib qhib zuj zus, tiamsis tej lub nroog thiab xeev yuav muaj kev tswjfwm ntxiv kom tsis txhob kis cov kab mob. Tej lub zos uas tsis muaj kab mob yuav rov qab qhib kev kawm ntawv rau cov tub ntxhais kawm.
Lostsuas (Laos): Tsis tau muaj leejtwg raug kab mob COVID-19 tau 7 hnub lawm. Tseem fwv tau tshaj tawm hais tias yuav tsis pub pejxeem tawm sab nraud mus txog hnub xiab 3 lub 5 hli ntuj. Tsev kawm ntawv yuav kaw txog hnub ntawm no thiab. Nomtswv nqua hu pejxeem sawvdaws koom tes rau kev tiv thaiv yus tus kheej thiab tsev neeg thiaj muaj kev vam meej rau lub tebchaws thaum tej kab mob no dua mus tas.
Thaibteb (Thailand): Muaj 27 leej raug kab mob COVID-19 ntxiv rau hnub no, tiamsis tsis muaj leejtwg tuag. Tagnrho tebchaws muaj 2792 leej neeg raug lawm, 746 leej tseem pw tsev kho mob, thiab 47 tau tuag lawm. Tseem fwv tebchaws yuav pib qhib tej lub khw thiab chaw ua haujlwm rau lub limtiam no. Tsis tas li ntawd, pej xeem Thaib yuav tau txais kev pab cuam los ntawm nomtswv txog li 5,000 baht.
Nomtswv tau sablaj hais tias yuavtsum muaj 5 yam ua ntej yuav qhib kev ua lag luam thiab kev uasi. 1) Kuaj txhua tus neeg nkag tebchaws thiab kaw hauv tsev yog muaj kab mob. 2) Pejxeem yuavtsum looj ntsejmuag thiab txhob nyob sib ze. 3) Koomhaum saib xyuas lag luam mam li tshaj tawm hais tias cov lag luam twg yog cov qhib tau ua ntej. 4) Tej lub tsev kawm ntawv thiab chaw uasi uas tsis muaj cov raug kab mob coob yuav qhib tau yog tibneeg tsis txhob nyob uake ti ti. 5) Yuavtsum muaj ib lub koomhaum ua haujlwm saib xyuas cov raug kab mob txhua lub sijhawm.
(c) Copyright 2020 HMOOB.TV
Leave a Reply